Keçmişdə gül suyundan yalnız xoş qoxulu ətriyyat kimi istifadə edilirdi. Zaman keçdikcə onun gözəllik sahəsində də bir sıra faydaları məlum oldu. Xüsusilə dəriyə qulluq vasitəsi kimi gül suyu geniş tətbiq edilir. Onun antibakterial, təmizləyici və tonlaşdırıcı xüsusiyyətləri var.
Aztibb.az tibb saytlarına istinadla xəbər verir ki, dəri yaşlaşmasının qarşısının alınmasında, alt qatlara daxil olaraq oradakı piy və çirki təmizləməkdə onun müstəsna əhəmiyyəti var. Gül suyu pilinqdən sonra üzdəki gərginliyi, quruluğu və qaşıntını aradan qaldırır, üzdə yaranmış qızartını götürür, simanı canlı və parlaq göstərir.
O, ultrabənövşəyi günəş şüalarının səbəb olduğu dəri yanıqlarının müalicəsində də mühüm rol oynayır. Yanıq ağrılarını sakitləşdirir və sağaldır.
Gül suyu üzdəki civzələri aradan qaldırır. Makiyajdan əvvəl üzə vurulması simanın daha təbii və qüsursuz görünməsini təmin edir, gözaltı torbaları və şişkinliyi aradan qaldırır.
Gül suyunun istifadə qaydası ilə əlaqədar resept: “6 xörək qaşığı gül suyu, 1 xörək qaşığı rəndələnmiş sabun və 1 xörək qaşığı qliserin qarışdırılaraq istifadə olunur. Quru dəri üçün gül suyuna 1 xörək qaşığı badam yağı və 1 çay qaşığı qliserin əlavə edilib qarışdırılaraq tətbiq edilir”.