Uşaq nevroloqu, professor Sedat Işıkay uşaqlarda qısa müddətli dalıb getmənin və ətrafdakılara reaksiya verməmənin epileptik tutma əlaməti ola biləcəyini bildirərək valideynləri diqqətli olmağa çağırıb.

Aztibb.az "CN Türk"ə istinadən yazır ki, uşaqlar bəzən oyun oynayarkən, dərs dinləyərkən və ya söhbət zamanı qəfil dayanır, bir neçə saniyə ərzində ətrafda baş verənlərə reaksiya vermirlər. Bu hallar çox vaxt dalğınlıq və ya diqqət dağınıqlığı kimi qəbul edilsə də, bəzi hallarda epileptik tutmanın əlaməti ola bilər.

Professorun sözlərinə görə, uşaqlarda bütün epileptik tutmalar qıcolma və yıxılma ilə müşayiət olunmur. Bəzi tutmalar yalnız bir neçə saniyə davam edən dalıb getmə və şüurun qısa müddətə itməsi şəklində özünü göstərir. Xüsusilə bu hallar tez-tez təkrarlanırsa, səbəbi araşdırılmalıdır.

Bununla belə, hər dalğınlıq epilepsiya demək deyil. Yorğunluq, yuxu rejiminin pozulması və diqqət problemləri də oxşar vəziyyət yarada bilər. Düzgün qiymətləndirmə üçün epizodların xüsusiyyətləri, nə qədər tez-tez baş verməsi və uşağın həmin vaxt ətrafdakılara reaksiya verib-verməməsi nəzərə alınmalıdır. Zərurət olduqda uşaq nevroloqunun müayinəsi və elektroensefaloqrafiya (EEQ) tətbiq edilə bilər.

Professor valideynlərə təkrarlanan dalıb getmə hallarını diqqətdən kənarda qoymamağı, epizodların müddətini, tezliyini və hansı şəraitdə baş verdiyini qeyd etməyi tövsiyə edib. Epileptik tutma şübhəsi olduqda uşağın mütəxəssis tərəfindən müayinə olunması erkən diaqnoz və düzgün müalicə baxımından vacibdir.