Məktəblilərin sağlam böyüməsi, fiziki və zehni inkişafı üçün düzgün və balanslaşdırılmış qidalanma mühüm əhəmiyyət daşıyır. Bu baxımdan, uşaqların məktəbə aparacağı qidaların seçilməsində valideynlərin üzərinə böyük məsuliyyət düşür. Qida çantasında uşağın enerji ehtiyacını qarşılayan, vitamin və minerallarla zəngin, faydalı məhsulların yer alması vacibdir.

Aztibb.az xəbər verir ki, Bakı Baş Səhiyyə Mərkəzinin strukturuna daxil olan 7 nömrəli Uşaq Poliklinikasının həkim-pediatrı Elnarə Qurbanova uşaqlar üçün faydalı qidaların seçilməsi ilə bağlı tövsiyələrini bölüşüb.

Həkimin sözlərinə görə, uşaqların əzələ və toxumalarının inkişafı üçün zülalla zəngin qidalar vacibdir. Bu baxımdan, qaynadılmış yumurta, ət və ət məhsulları, balıq, eləcə də quş əti məktəblilərin qida çantasına daxil edilə bilər.

Pediatr qeyd edib ki, meyvə və tərəvəzlər vitaminlərlə zəngin olmaqla uşaqların sağlamlığının qorunmasına kömək edir. Alma, banan və üzüm kimi meyvələr, yerkökü və xiyar kimi tərəvəzlər uşaqların gündəlik qidalanmasında yer almalıdır.

Tam taxıl məhsulları lif və karbohidrat mənbəyi kimi orqanizmi enerji ilə təmin edir. Taxıl çörəyindən hazırlanmış sendviçlər, krekerlər və simit məktəbli çantası üçün uyğun seçimlər sırasındadır.

Elnarə Qurbanovanın sözlərinə görə, süd məhsulları da uşaqların qidalanmasında mühüm yer tutur. Kalsiumla zəngin olan pendir, qatıq və süd sümük və dişlərin sağlam inkişafına dəstək verir. Bununla yanaşı, uşaqların qida rasionuna qoz, badam kimi çərəzlərin və quru meyvələrin əlavə edilməsi də faydalıdır. Bu məhsullar orqanizmi vacib qida maddələri ilə təmin edir.

Həkim-pediatr məktəblilərin çantasına qoyulan içkilərin seçiminə də diqqət yetirməyin vacibliyini vurğulayıb. Onun sözlərinə görə, uşaqlar üçün ən uyğun içki sudur. Şəkər əlavə edilməmiş meyvə şirələri isə miqdarına diqqət yetirilməklə qidalanmaya daxil edilə bilər.

Elnarə Qurbanova bildirib ki, balanslaşdırılmış və qida maddələri ilə zəngin qidalanma uşaqların normal inkişafı, diqqətini cəmləməsi və dərs prosesində fəallığı baxımından əhəmiyyətlidir. Buna görə də valideynlər məktəblilərin qida çantasını hazırlayarkən məhsulların həm qida dəyərinə, həm də müxtəlifliyinə diqqət yetirməlidirlər.