Azərbaycan Milli Elmlər Akademiyasının vitse-prezidenti, Elm və Təhsil Nazirliyinin İnformasiya Texnologiyaları İnstitutunun baş direktoru, akademik Rasim Əliquliyev Azərbaycan Tibb Universitetinin (ATU) 12-ci Bakı Beynəlxalq Kitab Sərgisində təqdim olunan stendini ziyarət edib.

 

 

Bu barədə Aztibb.az-a ATU-dan məlumat verilib.

 

Bildirilib ki, akademik Rasim Əliquliyev universitetin nəşriyyat fəaliyyəti, yeni çapdan çıxmış dərslik və dərs vəsaitləri ilə yaxından maraqlanıb, ATU-da elmi biliklərin sistemli şəkildə toplanması, nəşri və tədris prosesinə inteqrasiyası istiqamətində görülən işlərlə tanış olub.

 

Sərgü müddətində abituriyentlərin, tələbələrin, müəllimlərin və digər sərgi iştirakçılarının diqqətini cəlb edən ATU stendi geniş maraq doğurub. Stendi ziyarət edənlər arasında akademik Nizami Cəfərov, çağdaş ədəbiyyatın görkəmli nümayəndəsi Seyran Səxavət, xalq şairi Sabir Rüstəmxanlı, millət vəkilləri - Vüqar Rəhimzadə, Azay Kərimov və digər tanınmış şəxslər var.

 

ATU-nun sərgidə iştirakı yalnız universitetin nəşrlərinin tanıdılması baxımından deyil, həm də elmi biliklərin cəmiyyətə çatdırılması, mütaliə mədəniyyətinin təşviqi və təhsildə informasiya əlçatanlığının artırılması baxımından xüsusi əhəmiyyətə malikdir. Bu yanaşma Birləşmiş Millətlər Təşkilatının Dayanıqlı İnkişaf Məqsədlərindən 4-cü — Keyfiyyətli təhsil məqsədinin əsas hədəfləri ilə uzlaşır. Məqsəd hər kəs üçün inklüziv və bərabər keyfiyyətli təhsilin təmin edilməsini, eləcə də ömürboyu öyrənmə imkanlarının təşviqini nəzərdə tutur.

 

ATU-nun sərgidə təqdim etdiyi nəşrlər, kitabxana xidmətləri və elektron resurslar elmi biliklərin daha əlçatan olmasına, təhsil və tədqiqat imkanlarının genişlənməsinə, həmçinin dayanıqlı inkişaf üçün zəruri olan bilik cəmiyyətinin formalaşmasına töhfə verir.