AMEA-nın Molekulyar Biologiya və Biotexnologiyalar İnstitutunun Gənc alim və mütəxəssislər şurasının üzvləri Hərbi Qənimətlər Parkını ziyarət ediblər. Gənc tədqiqatçılar  44 günlük Vətən müharibəsi dövründə döyüş meydanında davamlı məğlubiyyətlərə məruz qalan düşməndən əldə etdiyimiz hərbi qənimətlərlə yaxından tanış olublar.

Bu barədə Aztibb.az-a şuranın sədri Nərgiz Bayramova məlumat verib. Şura sədri Parkın  gənc nəslin vətənpərvərlik ruhunda yetişməsində böyük rol oynadığını  vurğulayıb. Nərgiz Bayramova bildirib ki, İkinci Qarabağ müharibəsinin real nəticələri ilə daha yaxından tanış olmaq imkanı verən bu Parkda düşmənin illərdir müxtəlif vasitələrlə əldə etdiyi və gizlətdiyi hərbi texnikalarını canlı olaraq izləmək çox qürurvericidir.

Qeyd edək ki, Parkda Vətən müharibəsinin gedişində düşməndən qənimət götürülən hərbi texnikanın bir qismi, ümumilikdə 300-dən çox eksponat, o cümlədən 150-dək ağır texnika, tanklar, döyüş maşınları, artilleriya qurğuları, zenit-raket kompleksləri, atıcı silahlar, hərbi nəqliyyat sərgilənir.