Aztibb.az xəbər verir ki, bu barədə ilk dəfə varikozun lazerlə müalicə metodunu Azərbaycana gətirən Bakı Sağlamlıq Mərkəzinin ürək-damar cərrahı, professor Məhəmməd Kərimov Azad Azərbaycan TV-nin efirində deyib.

 

Professorun sözlərinə görə, 2010-2011-ci illərdə aparatın alınıb ölkəyə gətirilməsi, treninqlərlə metodikasının öyrənilməsinə vaxt sərf olunub: "Metodikanı öyrənmək üçün 4 ölkəyə getmişəm. İlk dəfə 2011-ci il fevralında 83 yaşlı bir qadında bu əməliyyatı icra etmişik". 

 

M.Kərimov bildirib ki, bu gün lazer müalicəsi dünyada varikoz xəstəliyinin müalicəsində qızıl standart sayılır. Artıq bu əməliyyatlar ABŞ-da 99% lazerlə icra olunur. Bu üsulun tətbiqindən sonra yeni metod yaranıb. Yeni metod lazerin bəzi çatışmayan cəhətlərini də aradan götürür. Bu, kimyəvi metodla damarların bağlanması üsuludur.

 

"2019-cu ilin noyabr ayında biz Azərbaycanda növbəti böyük ilkə imza atdıq. Bu metodun ən üstün cəhətlərindən biri də odur ki, xəstəliyin yenidən yaranma ehtimalı yoxdur", - deyə həkim qeyd edib.