ABŞ-ın Çikaqo Pediatriya Xəstəxanası alimlərinin tədqiqatına əsasən, yaşı 5-dən çox olan uşaqlar və böyüklər kimi, 5 yaşına qədər uşaqlar da COVID-19-u yaya bilərlər.

Aztibb.az popmech.ru saytına istinadla xəbər verir ki, tədqiqatda ilk simptomların yaranmasından bir həftədən az vaxt keçən yüngül və orta dərəcəli 145 COVID-19 hadisəsi analiz edilib. Xəstələr üç yaş qrupuna bölünüblər –  5 yaşa qədər, 5-dən 17 yaşa qədər olan uşaqlar və 18-dən 65 yaşa qədər böyüklər.

Alimlər aşkar ediblər ki, SARS-CoV-2-yə yoluxmuş 5 yaşa qədər uşaqlarda burunda genetik materialın səviyyəsi böyük yaş qruplarına nisbətən daha çoxdur.

Tədqiqatın müəllifi Teylor Hild-Sarcent araşdırma nəticələrini şərh edərək bildirib ki, 5 yaşa qədər olan COVID-19-lu uşaqlarda virus yüklənməsi yüksək olduğundan daha çox yoluxmalarla nəticələnə bilər.

Qeyd olunur ki, tədqiqatın nəticələri pandemiya şəraitində məktəblərin və uşaq bağçalarının yaxın zamanda açılmasına dair qərarlara təsir göstərə bilər.