Böyük Britaniya hökuməti ölkədə piylənmə ilə mübarizə üzrə yeni kampaniyaya start verildiyini elan edib. Məmurlar bu addımın vətəndaşların koronavirusa yoluxma riskini və beləliklə, səhiyyə xidmətində yüklənməni azaldacağını deyirlər.
Aztibb.az xəbər verir ki, bu barədə Böyük Britaniya hökumətinin mətbuat xidməti məlumat yayıb.
Birləşmiş Krallıqda piylənmə ilə mübarizə strategiyası əsasən televiziya və internetdə qeyri-sağlam qidaların reklamının məhdudlaşdırılmasını nəzərdə tutur. Qeyri-sağlam qidalara həddən artıq piyli, şəkərli və duzlu yeməklər aid edilir. Belə məhsulların reklamı səhər saatlarından axşam saat 21:00-dək qadağan olunacaq.
Bundan başqa, mağazalarda qeyri-sağlam qidalara endirim etməyə icazə verilməyəcək. Bunun əvəzində marketlər sağlam məhsulları, məsələn, meyvə və tərəvəzi daha çox ucuzlaşdıraraq təşviq və təklif edəcək. Həmçinin iri restoran və kafelər satdıqları qidaların kalori dəyərini məhsulun üzərində göstərməlidir.
Piylənmə Birləşmiş Krallığın səhiyyə sisteminin üzləşdiyi ən ciddi problemlərdən biridir. Hakimiyyət orqanlarının məlumatına görə, həddi-buluğa çatmış britaniyalıların 63 faizi artıq çəkidən əziyyət çəkir. Ölkədə ibtidai sinfi bitirən hər üçüncü uşaqda artıq çəki müşahidə olunur.
Artıq çəkinin səbəb olduğu xəstəliklər hər il Böyük Britaniyanın səhiyyə sisteminə 6 milyard funt sterlinqə başa gəlir. Bundan başqa, piylənmə COVID-19 xəstəliyinin ağır keçməsi, eləcə də ölüm riskini artırır.