Qlioblastoma baş beynin ən aqressiv şişlərindən biridir. Bununla belə, hətta eyni diaqnoz qoyulmuş iki xəstədə belə xəstəlik fərqli gedişə malik ola bilər.
Aztibb.az "Gazeta" nəşrinə istinadən yazır ki, bu barədə neyroonkoloq, tibb elmləri doktoru Marina Matsko məlumat verib.
Onun sözlərinə görə, şişin müalicəyə necə cavab verməsi, digər amillərlə yanaşı, onun hüceyrələrinin genetik xüsusiyyətlərindən də asılıdır.
Qlioblastomanın inkişafına məhz hansı amilin səbəb olduğu hələlik elmə məlum deyil. Əksər hallarda bu şiş spontan şəkildə yaranır və onun meydana gəlməsini hər hansı xarici təsirlə əlaqələndirmək mümkün olmur. Beyin şişlərinin digər növləri haqqında isə daha çox məlumat mövcuddur.
Məsələn, aşağı bədxassəlilik dərəcəsinə malik diffuz qliomalarda həkimlər IDH genindəki mutasiyanın rolunu ətraflı öyrəniblər. Bu genetik dəyişiklik hüceyrədə şişin böyüməsinə şərait yaradan prosesləri işə salır. Mütəxəssis buna misal olaraq astrositomaları və oliqodendroqliomaları göstərib.
“Bəzi hallarda insanda bir neçə növ şişin inkişaf riskini kəskin şəkildə artıran irsi sindromlar da aşkar edilir”, – deyə mütəxəssis müsahibəsində bildirib.
Qlioblastomanın inkişaf səbəbləri və müalicəyə cavab xüsusiyyətləri ilə bağlı elmi araşdırmalar davam edir. Xəstəliyin gedişi hər bir pasiyentdə fərdi xüsusiyyətlərə malik ola bilər.

