Respublika Klinik Xəstəxanasının cərrahi xidmətlər üzrə direktor müavini Sahib Hüseynov və həkim-ümumi cərrah Nigar Allahverdiyevanın iştirak etdiyi beynəlxalq tədqiqatın nəticələri nüfuzlu Q1 kateqoriyalı “World Journal of Surgery” jurnalında dərc olunub.

 

Bu barədə Aztibb.az-a Xəstəxanadan məlumat verilib.

 

Bildirilib ki, "Thirty-Day Mortality and Morbidity Outcomes in Abdominal Wall Necrotizing Soft Tissue Infections: The STANMORE Study” adlı məqalədə qarın divarının nekrotikləşdirici yumşaq toxuma infeksiyalarında 30 günlük ölüm və ağırlaşma göstəriciləri araşdırılıb.

 

27 ölkədən 63 tibb mərkəzinin iştirak etdiyi prospektiv, çoxmərkəzli beynəlxalq tədqiqat çərçivəsində 331 xəstənin məlumatları təhlil olunub. Tədqiqatda iştirak edən tibb mərkəzlərindən biri də Respublika Klinik Xəstəxanasıdır. Xəstəxanada müalicə olunan 50-dən çox xəstənin məlumatları da araşdırmaya daxil edilib.

 

Araşdırmanın nəticələrinə əsasən, yaşın artması, kreatinin səviyyəsinin yüksəlməsi, bağırsaq rezeksiyasının aparılması və antibiotikoterapiyanın başlanmasının gecikməsi 30 günlük ölüm riskinin artması ilə müstəqil şəkildə əlaqələndirilib. Polimikrob infeksiya və bağırsaq rezeksiyası isə ağırlaşma riskinin artması ilə müstəqil şəkildə əlaqələndirilib.

 

Tədqiqatın nəticələrinin nüfuzlu beynəlxalq elmi jurnalda dərc olunması Respublika Klinik Xəstəxanasının həkimlərinin beynəlxalq elmi-tədqiqat fəaliyyətində iştirakının və Azərbaycan səhiyyəsinin beynəlxalq elmi platformalarda təmsil olunmasının mühüm göstəricisidir.