Konqo Demokratik Respublikasında (KDR) Ebola epidemiyası sürətlə yayılmaqda davam edir. Ölkədə qeydə alınan yoluxma hallarının ümumi sayı artıq 5 min nəfərlik həddi aşıb.

Aztibb.az "SBS News" a istinadən yazır ki, Ümumdünya Səhiyyə Təşkilatının Afrika üzrə Regional Bürosunun məlumatına görə, cari ilin 18 avqust tarixinə olan vəziyyətə əsasən, KDR-də təsdiqlənmiş yoluxma sayı 5 021 nəfərə çatıb. Onlardan 2 378 nəfəri həyatını itirib ki, bu da 47,4 faizlik letallıq göstəricisi deməkdir.

ÜST-ün baş direktoru Tedros Adhanom Qebreyesus Fövqəladə Hallar Komitəsinin iclasında çıxış edərək xəstəliyin misli görünməmiş sürətlə yayıldığını və prosesin hələ də nəzarət altına alına bilmədiyini vurğulayıb: "Açıq desəm, bu epidemiya nəzarətdən çox uzaqdır. Ebola virusunun yayılma tempi lap əvvəldən bizi qabaqlayırdı və biz hələ də vəziyyəti sabitləşdirməyə çalışırıq."

Məlumatda həmçinin qeyd olunur ki, ÜST hazırkı təhlükəli "Bundibuqio" ştammı ilə mübarizə üçün beynəlxalq ictimaiyyətdən 115 milyon dollar maliyyə yardımı istəsə də, tələb olunan məbləğin indiyədək yalnız 60 faizini cəlb etmək mümkün olub.