Konqo Demokratik Respublikasında “Ebola” virusunun yayılması narahatlıq doğuran həddə çatıb. Ümumdünya Səhiyyə Təşkilatı (ÜST) epidemiyanın son aylarda əvvəlki illərlə müqayisədə daha sürətlə yayıldığını bildirir.

Aztibb.az yerli mediaya istinadla xəbər verir ki, şənbə gününədək olan rəsmi məlumatlara görə, son 24 saat ərzində 86 yeni yoluxma və 29 ölüm faktı qeydə alınıb. Ümumi virusa yoluxanların sayı artaraq 2267 nəfərə çatıb, 893 nəfər ölüb.

Xatırladaq ki, ÜST-nin baş direktoru Tedros Adhanom Qebreyesus bildirib ki, hazırkı epidemiya tarixdə qeydə alınan üçüncü ən böyük “Ebola” epidemiyasıdır və son bir ay ərzində əvvəlki epidemiyalarla müqayisədə daha sürətlə yayılıb.

ÜST rəhbərinin sözlərinə görə, 2018-ci ildə Konqo Demokratik Respublikasında baş vermiş “Ebola” epidemiyası zamanı 2000 təsdiqlənmiş yoluxma həddinə çatmaq üçün 10 aydan çox vaxt tələb olunmuşdu. 2018–2020-ci illərdə ölkədə qeydə alınan ən ağır epidemiya zamanı isə təxminən 3500 yoluxma halı aşkarlanmış, onlardan 2300-ü ölümlə nəticələnmişdi.

Mütəxəssislər hesab edirlər ki, yoluxma hallarının artım tempi epidemiyanın nəzarətdə saxlanılmasını çətinləşdirir. ÜST və beynəlxalq səhiyyə qurumları xəstəliyin daha geniş ərazilərə yayılmasının qarşısını almaq üçün müşahidə, erkən diaqnostika və peyvəndləmə tədbirlərinin gücləndirilməsinin vacibliyini vurğulayırlar.