Çukurova University Baytarlıq Fakültəsinin dekanı, professor Armağan Erdem Ütük bildirib ki, qlobal iqlim dəyişikliyi və gənələrə qarşı preparatların nəzarətsiz istifadəsi gənə populyasiyasının artmasına səbəb olur.

Aztibb.az "Medimagazin"ə istinadən yazır ki, onun sözlərinə görə, havaların isinməsi nəticəsində gənələrin aktivlik dövrü daha erkən başlayır və daha gec başa çatır. Bu isə onların sayının və çoxalma sürətinin artmasına gətirib çıxarır. Bundan əlavə, gənələrə qarşı istifadə olunan preparatların həddindən artıq və düzgün olmayan tətbiqi onlarda dərmanlara davamlılıq yaradır.

Mütəxəssis qeyd edib ki, meşələrin kənd təsərrüfatı sahələrinə çevrilməsi gəmiricilərin sayını artırır. Gəmiricilər isə gənələrin inkişafında mühüm rol oynadığından bu amil də populyasiyanın genişlənməsinə təsir göstərir.

Gənə və onun yaydığı xəstəliklərdən qorunmaq üçün riskli ərazilərdə piknik və istirahətdən çəkinmək tövsiyə olunur. Kənd təsərrüfatı işçiləri, çobanlar, ovçular və düşərgə həvəskarları uzunqollu, açıq rəngli geyimlər və qapalı ayaqqabılar geyinməli, açıq sahədən qayıtdıqdan sonra bədənlərini yoxlamalıdırlar.

Professor Ütük gənə dişləməsi zamanı edilən yanlış müdaxilələrə də diqqət çəkib. Onun sözlərinə görə, gənənin üzərinə od və ya kimyəvi maddələr tətbiq etmək təhlükəlidir, çünki bu zaman gənə daha çox xəstəliktörədici mikroorqanizm ötürə bilər.

Mütəxəssis vurğulayıb ki, ən vacib məsələ gənənin mümkün qədər tez və düzgün şəkildə çıxarılmasıdır. Bunun üçün incə uclu maqqaşdan istifadə etmək, əllə təmasdan qaçmaq və çıxarılan gənəni saxlayaraq zərurət olduqda tibb müəssisəsinə müraciət etmək tövsiyə edilir.