Antibiotiklərə davamlı bakteriyalar 25–30 ildən sonra xərçəng xəstəliklərindən daha çox insanın həyatına son qoya bilər. Bu cür narahatedici ssenarinin əsas səbəbi antimikrob preparatlardan nəzarətsiz istifadədir.

Aztibb.az "Life" portalına istinadən yazır ki, belə proqnozla Rusiya Elmlər Akademiyasının vitse-prezidenti, Moskva Dövlət Universitetinin Kimya fakültəsinin elmi rəhbəri Stepan Kalmıkov çıxış edib.

“25–30 ildən sonra antibiotiklərə davamlılıq səbəbindən ölənlərin sayı onkoloji xəstəliklərdən ölənlərin sayını üstələyəcək”, – deyə alim Novosibirskdə keçirilən SKIF-2026 beynəlxalq konfransında jurnalistlərə bildirib.

Alim xəbərdarlıq edib ki, geniş istifadə olunan dərmanlar bəzi infeksiyalara qarşı tədricən təsirini itirir. Bakteriyalar əvvəllər onları uğurla məhv edən preparatların təsirinə uyğunlaşır. Nəticədə antibiotiklərə davamlılıq səbəbindən hətta geniş yayılmış xəstəliklərin müalicəsi də xeyli çətinləşə bilər.

Problem artıq ayrı-ayrı ölkələrin hüdudlarını aşaraq qlobal miqyas alıb. Kalmıkovun sözlərinə görə, mikroorqanizmlərin dərmanlara davamlılığı BRİKS və BRİKS+ ölkələrinin elmi akademiyalarında müzakirə olunan bioloji təhlükəsizlik məsələlərinin əsas istiqamətlərindən biridir. Tədqiqatçı digər qlobal risklər sırasında yeni virus və bakteriyaların nəzarətsiz yayılmasını da qeyd edib.

“Superbakteriyalar”ın yaranmasının əsas səbəblərindən biri antibiotiklərin düzgün istifadə edilməməsidir. İnsanlar çox vaxt həkim təyinatı olmadan antibiotik qəbul edir, dozanı özbaşına dəyişir və ya müalicəni vaxtından əvvəl dayandırırlar. Heyvandarlıqda antibakterial vasitələrdən istifadə də vəziyyəti ağırlaşdırır. Bu preparatlar burada infeksiyaların qarşısını almaq və heyvanların böyüməsini sürətləndirmək məqsədilə tətbiq olunur.