Payızda burun axması həm virus infeksiyası, həm də allergiya ilə bağlı ola bilər. Bu halları bir-birindən ayırmaq üçün simptomlara diqqət yetirmək lazımdır.

Aztibb.az "Mednovelty" nəşrinə istinadən yazır ki, terapevt Svetlana Burnatskayanın sözlərinə görə, allergiya zamanı tez-tez asqırma, burun və gözlərdə qaşınma, şəffaf burun axıntısı və göz yaşarması müşahidə olunur. Adətən, hərarət yüksəlmir.

Virus infeksiyası zamanı isə boğazda ağrı və qıcıqlanma, halsızlıq, bədən ağrıları və bəzən hərarət yaranır. Burun axıntısı zamanla qatılaşa bilər.

Payızda allergiyanın səbəblərindən biri kif göbələklərinin sporlarıdır. Onlar torpaqda və bitki qalıqlarında olur, rütubət artdıqda isə çoxalırlar. Tökmüş yarpaqların özü hər kəs üçün allergen deyil, lakin çürüyən yarpaqlarda kif göbələkləri inkişaf edə bilər.

Evdə də rütubət və zəif havalandırma nəticəsində kif yarana bilər. Bununla belə, payızda burun axmasının səbəbi yalnız kif deyil, digər allergenlər və virus infeksiyaları da ola bilər.

Allergiyanı soyuqdəymədən necə ayırmaq olar?

Virus infeksiyası adətən bir neçə gün ərzində yüngülləşir, lakin öskürək və burun tutulması daha uzun davam edə bilər. Allergiya isə insan allergenlə təmasda olduqca davam edir.

Burun axması hər il eyni mövsümdə təkrarlanırsa və ya müəyyən məkanda olduqdan sonra başlayırsa, bu, allergiyaya işarə edə bilər. Dəqiq səbəbi müəyyənləşdirmək üçün həkim simptomları, onların davametmə müddətini və mümkün allergenlərlə əlaqəsini qiymətləndirir. Lazım gəldikdə dəri allergiya testləri və ya qan analizi təyin olunur.

Allergiyadan şübhələnildikdə allergenlə təması azaltmaq, evi havalandırmaq və kifin yaranmasının qarşısını almaq vacibdir. Gəzintidən sonra üzün yuyulması və paltarın dəyişdirilməsi də kömək edə bilər.

Burun boşluğunu duzlu məhlulla yumaq simptomları yüngülləşdirə bilər. Allergiya əleyhinə dərmanlar isə həkim məsləhəti və ya istifadə təlimatına uyğun qəbul edilməlidir. Soyuqdəymə zamanı istirahət etmək, kifayət qədər maye qəbul etmək və simptomları yüngülləşdirən vasitələrdən istifadə etmək tövsiyə olunur. Antibiotiklər adi virus infeksiyalarına təsir göstərmir.

Burnatskaya qeyd edib ki, burun axması uzun müddət davam edərsə, mütəmadi təkrarlanarsa, güclü burun tutulması və ya nəfəs darlığı ilə müşayiət olunarsa, həkimə müraciət etmək lazımdır.

Terapevt Maksim Maskin isə bildirib ki, rütubətli və çürüyən yarpaqlarda kif sporları çoxalaraq allergik reaksiyalara səbəb ola bilər. Kif allergiyası tez-tez soyuqdəymə ilə qarışdırılır, lakin adətən hərarətin yüksəlməməsi ilə fərqlənir. Allergiyası və astması olanlar, uşaqlar və yaşlılar risk qrupuna daxildir.