Düz bağırsaq sallanması bağırsağın bir hissəsinin anal dəlikdən xaricə çıxması ilə müşahidə olunan vəziyyətdir.

Aztibb.az xəbər verir ki, cərrah-proktoloq, endoskopist Anar Əliyevin sözlərinə görə, bu problem zamanı yaranan əlamətlərə diqqət yetirmək və vaxtında mütəxəssisə müraciət etmək vacibdir.

Düz bağırsaq sallanması ilkin mərhələlərdə yalnız gücənmə zamanı müşahidə oluna bilər, irəliləmiş hallarda isə daha davamlı xarakter ala bilər. Anal nahiyədə xaricə çıxan toxuma, nəcis ifrazı zamanı gücənmənin artması, bağırsağın tam boşalmaması hissi, selikli ifrazat və narahatlıq bu vəziyyətin əsas əlamətləri sırasındadır.

Bu əlamətlər hemorroyla da qarışdırıla bilər. Buna görə də dəqiq diaqnozun qoyulması üçün proktoloq müayinəsi vacibdir. Müalicə üsulu problemin ağırlıq dərəcəsinə və pasiyentin vəziyyətinə uyğun müəyyən edilir.

Ekspert vurğulayıb ki, bu problemə görə həkimə müraciət etməkdən çəkinmək olmaz. Vaxtında müayinə düzgün diaqnozun qoyulmasına və uyğun müalicə üsulunun seçilməsinə kömək edir.