Mütəmadi və uzunmüddətli xroniki stress mədə xorası xəstəliyinin inkişafına gətirib çıxara bilər. Buna görə də daimi stress şəraitində yaşayan kişilər sağlamlıqlarına xüsusi diqqət yetirməlidirlər.

Aztibb.az "Life" portalına istinadən yazır ki, bu barədə qastroenteroloq və hepatoloq Nuriyyə Dianova xəbərdarlıq edib.

Onun sözlərinə görə, mədə xorası çoxsaylı amillərin təsiri nəticəsində yaranan xəstəlikdir. Stresslə yanaşı, qidalanma rejiminin pozulması, siqaret çəkmək və spirtli içki qəbulu da xəstəliyin inkişafına səbəb ola bilər. Bu amillərin birgə təsiri isə vəziyyəti daha da ağırlaşdıraraq cərrahi müdaxilə ehtiyacını yarada bilər.

Həkim bildirib ki, narahatlıq yaradan əlamətləri görməzlikdən gəlmək və ya stressi alkoqol vasitəsilə azaltmağa çalışmaq xəstəliyin ağırlaşmasına səbəb olur. Nəticədə qanaxma ilə müşayiət olunan mədə xorası kimi ciddi fəsadlar meydana çıxa bilər.

Mütəxəssis həmçinin qeyd edib ki, "kişi klimaksı" kimi tanınan andropauza əlverişsiz amillərin təsiri nəticəsində istənilən yaşda baş verə bilər. Hətta gənc kişilər də testosteron çatışmazlığı problemi ilə üzləşə bilərlər.