Dövlət Gömrük Komitəsinin Tibbi Xidmət İdarəsinin Elmi-Təcrübi və Tədris Mərkəzinin təşkilatçılığı ilə Mərkəzi Gömrük Hospitalında həkimlər və rezidentlər üçün növbəti cümə seminarı keçirilib.

Bu barədə Aztibb.az-a Hospitaldan xəbər verilib.

Bildirilib ki, “Elmi klinik tədqiqatlar: metodoloji əsaslar və etik məsələlər” mövzusuna həsr olunan seminarın məqsədi Mərkəzi Gömrük Hospitalının gənc həkim və rezidentlərinin klinik araşdırmaların düzgün planlaşdırılması, biostatistik metodların tətbiqi, eləcə də tədqiqat prosesində beynəlxalq GCP (Yaxşı Klinik Təcrübə) prinsiplərinə və etik standartlara riayət olunması sahəsində bilik və bacarıqlarının artırılması olub.

Seminarda çıxış edən Mərkəzi Gömrük Hospitalının rəis müavini, kardioloq Nabil Seyidov elmi klinik tədqiqatların müasir səhiyyənin inkişafında xüsusi əhəmiyyət kəsb etdiyini vurğulayıb. O bildirib ki, sübuta əsaslanan tibbin əsasını təşkil edən klinik araşdırmalar yeni müalicə üsullarının effektivliyinin qiymətləndirilməsi, tibbi xidmətlərin keyfiyyətinin yüksəldilməsi və pasiyent təhlükəsizliyinin təmin olunması baxımından mühüm rol oynayır. Nabil Seyidov həmçinin qeyd edib ki, beynəlxalq metodoloji və etik standartlara uyğun aparılan tədqiqatlar səhiyyə sahəsində etibarlı elmi nəticələrin əldə edilməsinə və innovativ yanaşmaların tətbiqinə geniş imkan yaradır.

Seminar çərçivəsində klinik tədqiqatların metodoloji əsasları, biostatistikanın əsas anlayışları, p-dəyəri, effekt ölçüsü, güvən aralığı və hipotez testləri barədə məlumat təqdim olunub. Eyni zamanda, GCP (Yaxşı Klinik Təcrübə) prinsipləri, Məlumatlı Razılıq Formasının (ICF) alınması prosedurları, tədqiqatçının etik öhdəlikləri və klinik sənədləşmə qaydaları iştirakçıların diqqətinə çatdırılıb. Mövzular praktiki nümunələr əsasında izah olunub və iştirakçılarla fikir mübadiləsi aparılıb.

Seminar iştirakçıların suallarının cavablandırılması və mövzu ətrafında geniş fikir mübadiləsinin aparılması ilə yekunlaşıb.