Qidalanma vərdişləri bir çox xəstəliklərin, o cümlədən xərçəngin yaranma riskinə təsir göstərən əsas amillərdən biridir.

Aztibb.az xəbər verir ki, cərrah-proktoloq və endoskopist Anar Əliyevin sözlərinə görə, insanlar gündəlik həyatlarında fərqinə varmadan xərçəng riskini artıra bilən qidaları müntəzəm şəkildə qəbul edirlər.

Həkim bildirib ki, həddindən artıq işlənmiş, çox yağlı və müxtəlif kimyəvi əlavələrlə zəngin qidaların uzun müddət istifadəsi orqanizmə ciddi zərər vura bilər. Onun sözlərinə görə, fast food məhsulları, hisə verilmiş qidalar, sosis və kolbasa kimi işlənmiş ət məhsulları, trans yağlarla zəngin qidalar, eləcə də həddindən artıq şəkərli içkilər və qidalar sağlamlıq üçün risk yaradan əsas məhsullar sırasındadır.

Mütəxəssis vurğulayıb ki, sağlam qidalanma yalnız bədən çəkisinin normada saxlanılması üçün deyil, həm də gələcəkdə yarana biləcək ciddi xəstəliklərin qarşısının alınması baxımından mühüm əhəmiyyət daşıyır. O qeyd edib ki, təbii və balanslı qidalanma prinsiplərinə əməl etmək bir çox xəstəliklərin, o cümlədən xərçəngin inkişaf riskinin azalmasına kömək edir.