Qadınlar arasında ən çox rast gəlinən onkoloji xəstəliklərdən biri olan uşaqlıq boynu (serviks) xərçəngi erkən mərhələdə adətən heç bir simptom göstərmir. Mütəxəssislərin fikrincə, bu xəstəliyin qarşısının alınmasında iki əsas vasitə – HPV peyvəndi və müntəzəm skrininq müayinələri mühüm rol oynayır.

Aztibb.az "Medimagazin"ə istinadən yazır ki, qadın xəstəlikləri və doğum üzrə mütəxəssis Esma Gürün sözlərinə görə, serviks xərçəngi hallarının demək olar ki, hamısı insan papilloma virusu (HPV) ilə əlaqədardır. Virusun yüksək riskli növləri uzun müddət orqanizmdə qaldıqda uşaqlıq boynu hüceyrələrində dəyişikliklər yarada və zamanla xərçəngə səbəb ola bilər.

Mütəxəssis vurğulayıb ki, xəstəliyin ən təhlükəli xüsusiyyəti erkən dövrdə gizli inkişaf etməsidir. İrəliləmiş mərhələlərdə isə aşağıdakı əlamətlər müşahidə oluna bilər:

Menstruasiya dövrləri arasında qanaxmalar;
Cinsi əlaqədən sonra qanaxma;
Menopauzadan sonra qanlı ifrazatlar;
Qeyri-adi və xoşagəlməz qoxulu vaginal axıntı;
Çanaq nahiyəsində davamlı ağrılar.

Həkim bu əlamətlərdən hər hansı biri müşahidə olunduqda dərhal mütəxəssisə müraciət etməyi tövsiyə edir.

Onun sözlərinə görə, Pap-smear testi və HPV skrininqi xərçəngdən əvvəl yaranan hüceyrə dəyişikliklərini erkən aşkar etməyə imkan verir. Bu müayinələr serviks xərçəngi ilə bağlı ölüm hallarının azalmasında mühüm rol oynayır.

Mütəxəssislər həmçinin qeyd edirlər ki, HPV peyvəndi xəstəliyin profilaktikasında ən təsirli vasitələrdən biridir. Peyvənd xüsusilə yeniyetmə yaşlarında daha yüksək qoruyuculuq göstərsə də, uyğun yaş qrupundakı qadın və kişilər də həkim məsləhəti ilə peyvənd oluna bilərlər.

Qeyd olunur ki, HPV peyvəndinin müntəzəm skrininq müayinələri ilə birlikdə tətbiqi uşaqlıq boynu xərçəngindən qorunmada ən effektiv yanaşma hesab edilir. Bu səbəbdən qadınlara heç bir şikayətləri olmasa belə, müəyyən olunmuş intervallarla ginekoloji müayinələrdən keçmək tövsiyə olunur.