Medical Xpress: Diabet diş itkisi riskini artırır

I və II tip şəkərli diabetdən əziyyət çəkən şəxslər diabeti olmayan insanlarla müqayisədə dişlərini daha tez-tez itirirlər. Bundan əlavə, onlarda diş implantları ətrafında iltihabın yaranması və implantların itirilməsi riski də daha yüksəkdir.

Aztibb.az "Medical Xpress" nəşrinə istinadən yazır ki, stomatoloq Anna Trulenke Erikssonnun sözlərinə görə, stomatoloji yardım diabetin profilaktikası strategiyalarının ayrılmaz hissəsinə çevrilməlidir.

Tədqiqat uzunmüddətli müşahidələr əsasında İsveçin yeddi milli reyestrindən əldə olunan məlumatlara söykənir. Araşdırma çərçivəsində I tip diabetli 86 273, II tip diabetli isə 786 305 pasiyentin məlumatları təhlil edilib. Bir sıra göstəricilər əlavə olaraq Danimarka məlumatları ilə də müqayisə olunub.

Müəyyən edilib ki, I tip diabetli xəstələrdə qanda şəkərin səviyyəsinə nəzarət zəif olduqda parodontit və diş itkisi riski əhəmiyyətli dərəcədə artır. On il ərzində qeyri-qənaətbəxş qlikemik nəzarətə malik xəstələrin 43,5 faizi ən azı bir dişini itirib. Yaxşı qlikemik nəzarətə malik şəxslərdə bu göstərici 25,3 faiz, diabeti olmayan insanlarda isə 29 faiz təşkil edib. Qanda qlükoza səviyyəsi sabit və normal saxlanıldıqda nəzarət qrupu ilə ciddi fərqlər müşahidə edilməyib.

II tip diabet zamanı isə parodontit və diş itkisi riski qanda şəkərin nəzarət səviyyəsindən asılı olmayaraq yüksək olub. Lakin qlikemik nəzarət zəif olduqda risk daha da artıb. On il ərzində zəif nəzarət olunan xəstələrin 54,9 faizi, yaxşı nəzarət olunanların 44 faizi və nəzarət qrupunun 37,8 faizi ən azı bir dişini itirib. Beş və daha çox diş itkisi zəif qlikemik nəzarətə malik pasiyentlərin 12,6 faizində qeydə alınıb. Diabeti olmayanlarda isə bu göstərici 3,7 faiz olub.

Diş implantı daşıyan pasiyentlər arasında hər iki tip diabetdən əziyyət çəkən şəxslərdə periimplantit – implant ətrafındakı toxumaların iltihabı – və implantın itirilməsi halları daha çox müşahidə olunub. Bu risk xüsusilə qanda şəkərin səviyyəsi qənaətbəxş nəzarətdə olmayan xəstələrdə yüksək olub.

Araşdırma həmçinin göstərib ki, tam dişsizlik riski aşağı sosial-iqtisadi statusa malik diabetli şəxslər arasında daha yüksəkdir.