Braziliyadakı São Paulo Universitetindən olan bir tədqiqat qrupu tibbdə görüntüləmə məqsədilə istifadə olunan ultrasəs dalğalarının virusları təsirsiz hala gətirə bildiyini laboratoriya şəraitində sübut edib. Aparılan təcrübələrdə yüksək tezlikli səs dalğalarının influenza A (H1N1) və koronavirusları fiziki olaraq parçaladığı müşahidə olunub.

Aztibb.az xəbər verir ki, bununla bağlı araşdırmanın nəticələri Scientific Reports jurnalında dərc olunub.

Tədqiqatçılar hazırda xəstəxanalarda istifadə edilən cihazlarla 3–20 MHz aralığında ultrasəs tezliklərini viruslar üzərində sınaqdan keçiriblər.

Əldə olunan nəticələr göstərib ki, səs dalğalarının yaratdığı mikroskopik titrəyişlər virusun xarici qişasını partlatmaq üçün kifayət edir. Alimlər bu prosesi qarğıdalının partlaması fenomeninə bənzədərək “virusla qışqıraraq mübarizə” kimi xarakterizə edirlər.

Akustik rezonans üsulundan istifadə olunur

Metodun əsasında “akustik rezonans” prinsipi dayanır. Səs dalğasının tezliyi virus qişasının təbii titrəyiş tezliyi ilə üst-üstə düşdükdə yaranan enerji yığılması yalnız virusun strukturunu hədəfə alır.

Təcrübələr zamanı ətraf hüceyrələrin temperatur və pH göstəricilərinin sabit qaldığı müəyyən edilib. Bu isə sağlam hüceyrələrə zərər vermədən yalnız virusların məhv edilməsinin mümkün olduğunu göstərir.

Tədqiqatçılardan Odemir Martinez Bruno bildirib ki, hadisə tamamilə həndəsi xarakter daşıyır və kürə formasında olan viruslar ultrasəs enerjisini daha effektiv mənimsəyir. Bu fiziki yanaşma sayəsində viruslar mutasiyaya uğrasalar belə, formaları dəyişmədiyi müddətdə bu üsuldan yayına bilməyəcəkləri ehtimal olunur.

Ekoloji və müqavimət yaratmayan həll

Mütəxəssislər qeyd edirlər ki, ənənəvi antiviral preparatların hazırlanması mürəkkəb proses tələb edir. Ultrasəs üsulu isə tullantı yaratmaması və viruslarda davamlılıq formalaşdırmaması səbəbindən “yaşıl” həll kimi qiymətləndirilir.

Metodun hələ klinik tətbiq mərhələsindən uzaq olduğu və heyvanlar üzərində sınaqdan keçirilmədiyi vurğulansa da, tədqiqat qrupu artıq Zika, Denqe qızdırması və Çikunqunya kimi digər viruslar üzərində də araşdırmalara başlayıb.