Saratov Dövlət Tibb Universitetinin (SSMU) alimləri beyin stimullaşdırılmasına əsaslanan innovativ texnikadan istifadə edərək uşaqlarda piylənmə ilə mübarizənin yeni üsulunu təqdim ediblər.
Aztibb.az “RİA Novosti”yə istinadən yazır ki, “transkranial maqnit terapiyası” kimi tanınan bu üsul beyinin fəaliyyətinə elektromaqnit təsirini nəzərdə tutur.
Tədqiqatlar göstərib ki, bu yanaşma piylənmə baş verən insanlarda testosteron hormonunun səviyyəsini artırır.
Testosteron β-endorfinlə birlikdə iştahın tənzimlənməsində və bədən çəkisinin azalmasında əsas rol oynayır. Hazırda bütün dünyada piylənmə problemi geniş yayılıb və uşaqlar da istisna deyil. Artıq çəki artımı “fəst fud” və yüksək emal olunmuş məhsulların həddindən artıq istehlakı ilə bağlıdır.
Qeyd etmək lazımdır ki, uşaqlıqda formalaşan pis yemək vərdişləri yetkinliyə qədər davam edə bilər. Erkən yaşlarda piylənmə şəkərli diabetdən xərçəngə qədər müxtəlif xəstəliklərə və əlilliyə səbəb ola bilər. Buna görə də Ümumdünya Səhiyyə Təşkilatı (ÜST) piylənməni rəsmən xəstəlik kimi tanıyır.
Müalicə prosedurları hərəkət edən maqnit sahəsi yaradan xüsusi qurğular vasitəsilə həyata keçirilir. Bu texnologiya həm də yerli cihaz istehsalçısı ilə birgə hazırlanıb. Uşaqlarda piylənmənin müalicəsində belə yeni perspektivlərlə alimlər və tibb mütəxəssisləri gənc nəsil arasında bu ciddi xəstəliyin yayılmasının azalacağını gözləyirlər.