Elm və Təhsil Nazirliyinin Neft-Kimya Prosesləri İnstitutunun (NKPİ) baş direktoru, akademik Vaqif Abbasov, Azərbaycan Dövlət Neft və Sənaye Universitetinin (ADNSU) kafedra müdiri, professor Fariz Əmirli, NKPİ-nin laboratoriya müdiri, ADNSU-nin müəllimi, texnika üzrə fəlsəfə doktoru, dosent Zaur Ağamalıyev, Bakı Sağlamlıq Mərkəzinin cərrah, mama-ginekoloqu, tibb üzrə fəlsəfə doktoru Zülfiyyə Abbasova və Radiasiya Problemləri İnstitutunun Təhsil şöbəsinin müdiri, biologiya üzrə fəlsəfə doktoru Nərmin Quliyevanın həmmüəllif olduqları “Qida kimyası” adlı dərslik çap olunub.
Bu barədə Aztibb.az-a AMEA-dan məlumat verilib.
Dərslik universitetlərdə Qida mühəndisliyi ixtisası üzrə “Qida mühəndisliyində qidalanma və sağlamlıq”, “Qida məhsullarının kimyası”, “Qida məhsullarının biokimyası”, “Qida sənayesində texnologi əməliyyatlar” fənlərindən təhsil alan tələbələrin və magistrlərin bu fənlərin yaxşı mənimsənilməsinə və dərindən öyrənilməsinə, həm nəzəri, həm də təcrübi biliklərin qazanmasına kömək edəcək.
Kitab, həmçinin qida sənayesinin istənilən sahəsində süd və süd məhsulları, balıq və balıq məhsulları, ət və ət məhsulları, şərabçılıq, çörək və unlu qənnadı məmulatları istehsal edən müəssisələrdə, elmi tədqiqat laboratoriyalarında, iaşə müəssələrində mühəndis-texnoloq, qida təhlükəsizliyi üzrə menecer, laboratoriya mütəxəssisi və s. kimi vəzifələrdə çalışan işçilər tərəfindən də istifadə oluna bilər.