Avropa İttifaqının (Aİ) maliyyə dəstəyi ilə həyata keçirilən “Psixi sağlamlıq xidmətlərinin münaqişədən sonrakı dövrdə koordinasiyası və transformasiyası” layihəsi çərçivəsində TƏBİB-in 20 əməkdaşı üçün “Təməl psixososisal dəstək üzrə Təlimçilərin Təlimi” təşkil edilib.
Aztibb.az ÜST-nin Azərbaycan Nümayənliyinə istinadla bildirir ki, təlimin əsas məqsədi TƏBİB-in ilkin səhiyyə xidmətinin müxtəlif sahələrində çalışan işçilərin psixososial dəstək üzrə bilik və bacarıqlarının artırılması istiqamətində təlimlər keçirilməsi üçün təlimçilər hazırlamaq olub. Bu isə, öz növbəsində psixososial sahədə biliklərini təkmilləşdirən TƏBİB əməkdaşlarının əhali ilə ünsiyyətinin səmərəli olmasına töhfə verəcək.
Təlim zamanı iştirakçılara təməl psixososial dəstək anlayışı, sosial-psixoloji yardımın əsas prinsipləri, effektiv ünsiyyət bacarıqları, ilkin psixoloji yardımın əsas anlayışları və fəaliyyət prinsiplərinin tətbiqi, itki, hüzn, özünə qayğı, stresə dayanıqlılıq və stresin idarə olunması mövzularında nəzəri məlumatlar verilib.
Həmçinin məlumatların mənimsənilməsi və praktiki bacarıqların artırılması məqsədilə simulyasiya məşğələləri, qrup işləri, keys müzakirələri və relaksasiya hərəkətləri təşkil olunub.