İyunun 13-də Azərbaycan Repsublikası Dövlət Gömrük Komitəsi Tibbi Xidmət İdarəsinin Mərkəzi Hospitalının təşkilatçılığı, TƏBİB-in və Yevlax şəhər İcra Hakimiyyətinin dəstəyi ilə Yevlax şəhər Mərkəzi Xəstəxanasının tabeliyində olan Ailə Sağlamlıq Mərkəzində qazi və şəhid ailələrinin üzvləri üçün sosial tibbi aksiya keçirilib.
Mərkəzi Gömrük Hospitalından Aztibb.az-a verilən xəbərə görə, tədbirin rəsmi açılış hissəsində Azərbaycan Respublikası Dövlət Gömrük Komitəsi Tibbi Xidmət İdarəsinin rəis müavini t.ü.f.d., dosent İsmayıl Əfəndiyev, Milli Məclisin deputatı İlham Məmmədov, Yevlax şəhəri İcra Hakimiyyətinin başçısının müavini Elnarə Əzizova və Yevlax şəhər Mərkəzi Xəstəxanasının direktoru Fazil İsmayılov və digər rəsmi nümayəndələr iştirak ediblər.
Əvvəlcə dosent İsmayıl Əfəndiyev Azərbaycan Respublikası Dövlət Gömrük Komitəsinin sədri, gömrük xidməti general-leytenantı Şahin Bağırovun, Dövlət Gömrük Komitəsi Tibbi Xidmət İdarəsinin rəisi, tibb xidməti general-mayoru Ceyhun Məmmədovun adından tədbir iştirakçılarını salamlayıb. O, tibbi sosial aksiyanın məqsədinin qazi və şəhid ailələrinin üzvlərinə tibbi xidmət göstərilməsi olduğunu bildirib. Qeyd edib ki, aksiyada Mərkəzi Gömrük Hospitalının yüksəkixtisaslı mütəxəssisləri iştirak edirlər, ən müasir tibbi avadanlıqlarla təchiz olunmuş mobil hospital və geniş çeşiddə dərmanlar şəhid və qazi ailələrinin üzvlərinin müayinəsində istifadə ediləcək. Bu məqsədlə Mərkəzi Gömrük Hospitalının USM, EKQ, EXO müayinələri, o cümlədən kardioloq, oftalmoloq, lor, travmatoloq cərrah, terapevt, uroloq, pediatr, nevroloq, mama ginekoloq, endokrinoloq, dermatoveneroloqdan ibarət 25 nəfər tibb heyəti Yevlax şəhərinə ezam olunub.
Milli Məclisin deputatı İlham Məmmədov bu aksiyanın Ulu Öndər Heydər Əliyevin əziz xatirəsinə həsr olunmuş silsilə tədbirlər sırasından olduğunu bildirib. İlham Məmmədov sosial tibbi aksiyanın keçirilməsinə göstərdikləri dəstəyə görə başda gömrük xidməti general-leytenantı Şahin Bağırov olmaqla, tibb xidməti general-mayoru Ceyhun Məmmədova, dosent İsmayıl Əfəndiyevə və Mərkəzi Gömrük Hospitalının tibb heyətinə minnətdarlığını bildirib.
Qeyd edək ki, Yevlax şəhərində keçirilən tibbi sosial aksiya 14 iyun 2023-cü il tarixində davam edəcək.