Amerika Ürək Assosiasiyasının (AHA) Azərbaycandakı beynəlxalq təlim mərkəzi olan Medic School Training Center tərəfindən Nizami Tibb Mərkəzinin Təcili Tibbi Yardım şöbəsinin həkimləri üçün ACLS – Təkmil Ürək-Damar Həyat Dəstəyi üzrə təlim təşkil olunub.

Aztibb.az xəbər verir ki, təlimin məqsədi ürək-damar mənşəli həyati təhlükəli vəziyyətlərin vaxtında tanınması, düzgün qiymətləndirilməsi və təcili müdaxilələrin beynəlxalq protokollara uyğun həyata keçirilməsi istiqamətində tibb işçilərinin nəzəri bilik və praktiki bacarıqlarını təkmilləşdirməkdir.

ACLS proqramı ürəyin dayanması və ürək dayanması riski ilə müşayiət olunan vəziyyətlərin idarə olunması, yüksək keyfiyyətli ürək-ağciyər reanimasiyasının aparılması, ürək ritmlərinin qiymətləndirilməsi və defibrilyasiyanın tətbiqi kimi mühüm istiqamətləri əhatə edir. Bununla yanaşı, tənəffüs yolunun idarə edilməsi, venadaxili və sümükdaxili girişin təmin olunması, dərman müdaxilələrinin müəyyən edilmiş alqoritmlər əsasında aparılması, eləcə də spontan qan dövranı bərpa olunduqdan sonra ilkin tibbi yanaşma məsələlərinə diqqət yetirilir.

Proqram çərçivəsində reanimasiya komandasında effektiv ünsiyyət, vəzifə bölgüsü və klinik qərarvermə bacarıqlarının inkişafı da əsas prioritetlərdəndir. Bu bacarıqların sistemli və koordinasiyalı şəkildə tətbiqi həyati təhlükəli vəziyyətlərdə tibbi yardımın operativ və protokollara uyğun göstərilməsi baxımından mühüm əhəmiyyət daşıyır.

Medic School Training Center Nizami Tibb Mərkəzinin həkimlərinə təlimdə iştiraklarına və peşəkar inkişaflarına göstərdikləri marağa görə təşəkkür edib, onlara gündəlik klinik fəaliyyətlərində uğurlar arzulayıb.