TƏBİB-in tabeliyində fəaliyyət göstərən Qusar Rayon Mərkəzi Xəstəxanasında "Qan ver, Həyat xilas et" devizi altında könüllü qanvermə aksiyası keçirilib.
Bu barədə Aztibb.az-a Xəstəxanadan məlumat verilib.
Ulu Öndər Heydər Əliyevin 100 illik yubileyi münasibətilə Qusar Rayon İcra Hakimiyyətinin və Rayon Mərkəzi Xəstəxanasının təşkilatçılığı ilə baş tutub.
Aksiyanın keçirilməsində əsas məqsəd Azərbaycanın ərazi bütövlüyü uğrunda ön sıralarda vuruşan hərbçilərimizin sağlamlığı, hemofiliya və talassemiya xəstəliyindən əziyyət çəkən şəxslərin qanla təminatına yardım etməkdir.
Humanitar aksiyada Milli Hematologiya və Transfuziologiya Mərkəzinin Qan Bankının xüsusi tibb briqadasının həkim-hematoloqları Rayon Mərkəzi Xəstəxanasının tibb heyəti ilə birgə donorları müayinə etdikdən sonra onlardan qan götürüblər.
Qeyd edək ki, aksiyada Qusar Rayon İcra Hakimiyyətinin rəhbərliyi, rayonun hüquq-mühafizə orqanlarının rəhbərləri, şəhid ailələri və ictimaiyyət nümayəndələri iştirak ediblər.
Həmçinin Qusar Rayon Mərkəzi Xəstəxanasının 100-ə yaxın tibb personalı könüllü surətdə qanvermə aksiyasında iştirak edib.
Beləliklə, aksiyaya qatılan donorlar qan xəstəliklərindən əziyyət çəkən insanlar üçün qan tədarükünün artırılmasına dəstək olublar.
Qanvermə aksiyasında ümumillikdə 169 nəfər könüllü vətəndaş iştirak edib.
