Yoluxucu xəstəliklər mütəxəssisi dr. Gürkan Yılmaz qripin virusların səbəb olduğu tənəffüs yolu infeksiyası olduğunu bildirərək qeyd edib ki, burun, boğaz və ağciyərləri tutan bu xəstəlik həyat üçün təhlükəli yoluxucu xəstəliklərdən hesab edilir. 

Aztibb.az cumhuriyet.com.tr-yə istinadən xəbər verir ki, hər qış mövsümündə epidemiyalara səbəb olan qrip virusu strukturunu sürətlə dəyişə bilir.

Müşahidə edilir ki, son günlər qrip epidemiyası nəticəsində səhiyyə müəssisələrinə müraciət edənlərin sayı daha çoxdur. Qrip virusunda tez-tez baş verən struktur dəyişikliklərinin hər il və tez-tez xəstəliyə tutulmağımızın əsas səbəbi olduğunu deyən mütəxəssis qrip virusunun əsasən öskürmə, asqırma və danışma zamanı yaranan damlacıqların ağız, burun və gözlərlə təması nəticəsində yayıldığını vurğulayıb. 

Bundan əlavə, virus çirklənmiş səthlərdə 2-8 saat öz canlılığını saxlaya bilir. Xəstəliyin ilk günlərində evdə dincəlmək yoluxma sürətini azaltmaqda təsirli olur. 

Həmçinin xəstənin otağı tez-tez havalandırılmalı, əllər tez-tez yuyulmalıdır. Ağır xəstəliyə tutulma riski olmasın deyə maska taxmaq faydalıdır. 

Qrip qızdırma, öskürək, titrəmə, üşütmə, boğaz ağrısı, baş ağrısı, burun axması, əzələ-oynaq ağrıları ilə özünü göstərən xəstəlikdir. Öskürək iki həftə və ya daha çox davam edə bilər. Davamlı olaraq yüksək hərarət, bəlğəm və təngnəfəslik ağciyərlərin də xəstəlikdən təsirləndiyini göstərir.  

Risk qrupunda olan insanlar həkimləri tövsiyə edərsə, virusa qarşı yüksək təsirli antiviral dərmanlardan istifadə etməlidirlər.