Avropa Xəstəliklərin Qarşısının Alınması və Nəzarəti Mərkəzi Kraken subvariantının risk səviyyəsinin aşağı olduğunu açıqlayıb. 

Aztibb.az ntv.com.tr-yə istinadən xəbər verir ki, Avropa Birliyinin (Aİ) Səhiyyə agentliyi ECDC Omicronun "Kraken" adlı XBB.1.5 alt variantı üçün risk qiymətləndirməsini dərc edib. 

Avropa ölkələri üçün Krakenin ümumi risk səviyyəsini ümumi əhali üçün "aşağı" olaraq təyin edən ECDC, bu alt variantın yaratdığı riskin yaşlılar, peyvənd olunmamış və immuniteti zəif olanlar üçün "orta və yüksək" olduğunu qeyd edib. 

Qiymətləndirmənin yaxın həftələrdə dəyişə biləcəyini vurğulayan ECDC, bu alt variantın 1-2 ay ərzində Aİ-də dominant olacağına dair proqnozunu da paylaşıb. 2022-ci ilin son iki həftəsində Avropada koronaviruslar arasında XBB.1.5 nisbətinin 2,5 faiz olduğu, ABŞ-dakı mövcud variantlardan 12 faiz daha sürətli yayıldığı bildirilib. 

Qeyd edək ki, XBB.1.5 subvariantı ilk dəfə 2022-ci ilin oktyabrında ABŞ-da aşkar edilib.