Gəncə Şəhər Birləşmiş Xəstəxanasında hərb tariximizin ən şanlı səhifələrindən biri olan Zəfər Günü ilə bağlı “Yaddaş saatı” adlı tədbir keçirilib.
Əvvəlcə 44 günlük Vətən müharibəsində canlarından keçmiş qəhrəman şəhidlərimizin xatirəsi bir dəqiqəlik sükutla yad edilib, Azərbaycan Respublikasının Dövlət Himni səsləndirilib.
Zəfər Günü münasibətilə iştirakçıları təbrik edən Gəncə Şəhər Birləşmiş Xəstəxanasının direktoru Nazim Əhmədov Azərbaycan tarixinə qızıl hərflərlə yazılmış Zəfər Günü barədə məlumat verib. Bildirib ki, Prezident, Müzəffər Ali Baş Komandan İlham Əliyevin qətiyyətli mövqeyi və Azərbaycan Ordusunun rəşadəti erməni vandalizminə son qoydu, Azərbaycan xalqı Qarabağa və Qarabağ ətrafındakı dədə-baba yurdumuz olan torpaqlarına qovuşdu. O, Vətən müharibəsində Zəfər salnaməsi yazan bütün qəhrəmanlarımızın xatirəsinin xalqımızın qəlbində əbədi yaşayacağını vurğulayıb.
Sonra 44 günlük müharibəni əks etdirən videoçarx nümayiş etdirilib.
Tədbirdə çıxış edən Abbas Səhhət adına xəstəxananın tibb bacısı, Vətən müharibəsində yaralı hərbçilərə yorulmadan tibbi xidmət göstərən Sevda Əsgərova, Gəncə Şəhər Birləşmiş Xəstəxanasının hüquqşünası, müharibə iştirakçısı Hadi Hüseynov, anbar müdiri, ehtiyatda olan polkovnik Əli Verdiyev, Akad.Z.Məmmədov adına xəstəxananın əməkdaşı, müharibə iştirakçısı Ayxan Əsədov Vətən müharibəsinin tariximizin ən parlaq səhifəsinə Azərbaycan xalqının iftixar və qürur mənbəyi kimi daxil olduğunu qeyd ediblər.