Kreatinin - əzələ hərəkətinə lazım olan kreatindən əmələ gələn birləşmədir. Əzələ metabolizmasının istehsalı olan bu maddə böyrəklərdən sidik vasitəsilə dəyişmədən birbaşa ifraz olunur.
Aztibb.az xəbər verir ki, bu barədə nefroloq Barat Yusubov sosial şəbəkədə məlumat paylaşıb.
Həkim bildirib ki, böyrək funksiyaları pozulduğu zaman kreatinin ifrazı ləngiyir və qanda kreatinin səviyyəsi yüksəlməyə başlayır. Kreatin analizləri adətən böyrək funksiyalarını və xəstəliklərini dəyərləndirmək üçün aparılır.
Onun sözlərinə görə, əzələ xəstəlikləri, revmatoid artrid, hormonal pozğunluqlar, infeksiya və sümük qırılmaları da qanda kreatinin səviyyəsini artıra bilər.
"Az proteinli qidalanma, protein sintezinin artdığı zaman və hamiləlik dövründə qanda kreatinin serum səviyyəsi aşağı olur", - deyə Barat Yusubov bildirib.
