Adətən hər zaman balın insanlara müalicəvi təsir göstərməsi barədə danışırıq. Amma insana kefləndirici təsir göstərən ballar da var. Belə balları zəhərli də hesab edirlər. Bu balı arılar dağlarda xüsusi bitkilərdən toplayırlar.

Aztibb.az xəbər verir ki, zəhərli bala bəzən "buz balı" da deyilir. Bu bal azaliya, andromed, bataqlıq çiçəkləri və digər müxtəlif zəhərli çiçəklərdən alınan baldır. Bu bal faydalı yox, çox zəhərli baldır. Balın tərkibində olan zəhərin miqdarı onun tərkibindəki alkoloidlərin, andrometoksinlərin və rododendronların miqdarından asılıdır. Zəhərli balın ətri xoşagəlməz olur.

Daha çox dəfnə çiçəyindən alınan bal qeyri-adi xüsusiyyətə malik olaraq, insana kefləndirici təsir göstərir. Bu cür balı qəbul edən insanlarda bəzən temperatur qalxır, ürək bulanması, təngnəfəslik və baş gicəllənməsi müşahidə olunur. Belə balı bir il saxladıqdan sonra onun zəhərliliyi itir və yemək üçün yararlı olur.

Məlumatlara görə, tarixdə kefləndirici bal döyüşün məğlubiyyətlə başa çatmasına da səbəb olub. Roma ordusunun əsgərləri zəbt etdikləri bölgələrdə dəfnə balından yeyib kefləndikləri üçün vuruşda məğlub olublar.