Uzun müddətdir ki, Mərkəzi Gömrük Hospitalının “Facebook” səhifəsinin izləyicisi olan "İqtisadiyyat" jurnalının müxbiri, Azərbaycan Jurnalistlər Birliyinin üzvü Yeganə Məmmədova hospitalın tibbi maarifləndirilmə ilə bağlı gördüyü işlərə dair təəssüratlarını bölüşüb.

Y.Məmmədova Aztibb.az-a açıqlamasında hər gün Mərkəzi Gömrük Hospitalının “Facebook” səhifəsində paylaşılan faydalı məlumatlardan, həkim məsləhətlərindən yararlandığını, səhifəni izləməyin onun üçün adi vərdişə çevrildiyini bildirib:

“Təqdirəlayiq haldır ki, səhifədə tibbin bütün sahələrinə dair məlumatlar, faydalı məsləhətlər yerləşdirilir. Hətta bəzən elə olur ki, hər hansı sahədən bildiyim bir xəstəlik barədə səhifədən oxuyuram, görürəm ki, bu barədə bildiklərim çox az imiş. Hər dəfə səhifənizdə mənim üçün yeni, zəruri olan məsləhətlər tapıram”.

Bununla yanaşı, o, səhifədəki “Həkim məsləhəti” rubrikasını mütəmadi olaraq izlədiyini, COVID-19 pandemiyası dövründə peşəkar həkimlərdən koronavirusla mübarizə ilə bağlı dəyərli məsləhətlər əldə etdiyini qeyd edib.

“Mərkəzi Gömrük Hospitalının peşəkar, zəngin təcrübəli həkimləri - Tamilla Əliyevanın, Xumar Novruzovanın, Nərmin Muradovanın, Nazilə Hüseynovanın, Nazilə Xəlilbəyovanın, Nigar Rəhmətovanın, Mədinə Abdullayevanın, Ramin Rzayevin, Müseyib Əhmədovun və digərlərinin bu rubrikada verdiyi məsləhətlər hər kəs üçün maraqlı və faydalıdır. Hospitalın tanınmış həkimləri Rəşad Mahmudov, Bəxtiyar Musayev, Mircəlal Kazımi və başqalarının uğurları barədə oxuyub qürur hissi duyuram. Sevinirəm ki, Azərbaycanın da belə tanınmış, peşəkar həkimləri var”, - deyə Y.Məmmədova əlavə edib.  

O, bildirib ki, COVID-19 haqqında hər dəfə hospitalın “Facebook” səhifəsində oxuyanda yeni məlumat əldə edir: “COVID-19 ilə qrip arasındakı fərq barədə digər saytlarda məlumatlara rast gəlməmişəm. Bu iki təhlükəli xəstəliyi necə ayırmaq, xəstələndikdə nə etmək lazım olduğu barədə yol göstərən həkimlərə dərin minnətdarlığımı bildirir, fəaliyyətinizdə uğurlar diləyirəm”.