Ümümdünya Səhiyyə Təşkilatının (ÜST) araşdırma qrupu Çin alimləri ilə birgə koronavirus pandemiyası üzərində tədqiqatlar aparacaq. ÜST-ün baş direktoru Tedros Qebreyesus yeni növ koronavirusun mənbəyini araşdırmaq üçün təşkilat daxilindəki bir mütəxəssis qrupunun Çinə getdiyini bildirib.
Aztibb.az saytı gazeta.ru resursuna istinadən xəbər verir ki, ÜST mütəxəssisləri çinli həmkarları ilə birgə virusun heyvanlardan insanlara necə keçdiyini araşdıracaqlar.
Baş direktor Çindəki araşdırmaların ÜST-ün rəhbərliyi altında beynəlxalq missiyanın virus mənbəyi üzərində işləməsinə kömək edəcəyini söyləyib.
ÜST COVID-19 virusunun epidemiyanın ilk günlərindən bəri təbii mənşəli olduğunu iddia edir. Təşkilatın virusun mənbəyini araşdırmaq üçün 7 ay gözləməsi isə tənqidlərə səbəb olub.
Qeyd edək ki, ÜST yanvarın 14-də “Twitter” üzərindən verdiyi açıqlamasında Çin rəsmilərinə istinad edərək, virusun insandan insana ötürüldüyünə dair konkret dəlil olmadığı iddia etmişdi. Təşkilat yanvarın 20-də virusun daha çox heyvanlardan insanlara keçdiyini açıqlamışdı. Virusun yalnız istisna hallarda, məhdud sayda yaxın əlaqədə olan insanlardan bir-birinə keçə biləcəyini bildirmişdi.
