Sarımsağın ürək-damar sisteminə müsbət təsiri çoxdan məlumdur. Amma sən demə, təzə doğranmış sarımsaq daha faydalı imiş.

Aztibb.az xəbər verir ki, sarımsağın tərkibindəki əsas maddə allitsindir. Həmin maddə məhz sarımsağı doğrayan və sürtkəcdən keçirən zaman əmələ gəlir və tez də uçub gedir.

Konnektikut Universitetinin Ürək-Damar Xəstəlikləri Mərkəzinin alimi Dipak Das bununla əlaqədar tədqiqat aparıb. Onun müşahidələrindən biri göstərib ki, sarımsağın tərkibində faydalılığına görə birinci yeri iylənmiş yumurta qoxusu verən hidrogen-sulfid qazı tutur. Məhz hidrogen-sulfid qan damarlarının daxili divarlarının əzələlərinə müsbət təsir göstərir, spazmaları aradan qaldırır, onları boşaldır və bununla da, həyat üçün təhlükəli insult və infarktın qarşısını alır.

Təzə sarımsağın faydalılığını təsdiq etmək üçün siçanlar üzərində təcrübə aparılmışdır. Alimlər siçanın birinə təzə, o birinə isə qurudulmuş sarımsaq yedirtmişlər. Sonra isə süni infarkt vəziyyəti yaratmışlar. Təzə sarımsaq yemiş siçan quru sarımsaq yemiş siçanla müqayisədə daha tez sağalmışdır.

Alimlərin yeni kəşfi quru sarımsaqdan hazırlanmış müxtəlif kapsula və həb istehsalıçılarını narazı salıb. Çünki hazırda apteklərdə damarların və ürəyin, o cümlədən immun sisteminin möhkəmlənməsi üçün nəzərdə tutulmuş quru sarımsaq cövhərli saysız-hesabsız dərman preparatları, bioloji aktiv əlavələr satılır.