Hər il aprelin 17-si Dünya Səhiyyə Təşkilatının və Dünya Hemofiliya Federasiyasının təşəbbüsü ilə Ümumdünya Hemofiliya Günü kimi qeyd edilir. Həmin tarixin seçilməsi Dünya Hemofiliya Federasiyasını yaratmış Frenk Şnaybelin doğum günü ilə əlaqədardır. Onun təsis edilməsinin və qeyd olunmasının məqsədi qanın laxtalanması prosesinin pozulması ilə əlaqədar irsi xəstəlik olan hemofiliyadan əziyyət çəkən insanların hər gün üzləşdiyi problemlərə dünya ictimaiyyətinin, siyasətçilərin və səhiyyə işçilərinin diqqətini cəlb etmək, bu barədə onların məlumatını artırmaqdır. Bəzi məlumatlara görə, indi dünyada hemofiliya xəstələrinin sayı 400 min nəfərə çatır.

Aztibb.az xəbər verir ki, Ümumdünya Hemofiliya Günü ərəfəsində “Sputnik Azərbaycan” multimedia mətbuat mərkəzi (MMM) tərəfindən onlayn mətbuat konfransı təşkil olunub. MMM-nin "Facebook" səhifəsində canlı yayımlanan brifinqdə Hemofiliya Xəstələrin Respublika Assosiasiyasının (HXRA) sədri Ayaz Hüseynov karantin rejimi şəraitində hemofiliyanın müalicəsi, xəstəliyin artım dinamikası və digər məsələlərə toxunub.

Bildirilib ki, hazırda Azərbaycanda hemofiliyalı xəstələrin sayı 1704 nəfərdir, onlarda 300-dən çoxu uşaqlardır.

HXRA sədri vurğulayıb ki, 2006-cı ildən bu günə qədər dövlətin qayğısı nəticəsində pasiyentlər bahalı dərman preparatları ilə təmənnasız təmin olunurlar: "2005-ci ildə Dövlət Proqramı qəbul olunandan və 2006-cı ildən dərman preparatları gətiriləndən sonra bu xəstəlikdən ölüm halları minimuma enib. 2006-cı ildən qan laxtalandırıcı faktor preparatları ölkəmizə gətirilir və pasiyentlərə təmənnasız olaraq təqdim edilir".