Mərkəzdən Aztibb.az-a bildirilib ki, tədbir başlamazdan əvvəl Azərbaycan xalqının Ümummilli Lideri Heydər Əliyevin və Vətənimizin müstəqilliyi, ərazi bütövlüyü uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib. Dövlət Himninin səsləndirilməsindən sonra Ümummilli Lider Heydər Əliyevin həyat və fəaliyyətindən, Azərbaycan dövlətçiliyinin möhkəmləndirilməsi istiqamətində gördüyü misilsiz xidmətlərdən bəhs edən videorolik nümayiş etdirilib.

 

Daha sonra Pirallahı Tibb Mərkəzinin baş həkimi Fəranə Gözəlova çıxış edərək 15 İyun – Milli Qurtuluş Gününün Azərbaycan tarixindəki əhəmiyyətindən danışıb. O bildirib ki, 1993-cü ilin iyun ayında ölkəmiz mürəkkəb və taleyüklü bir dövr yaşayırdı. Məhz belə bir zamanda xalqın təkidli tələbi ilə hakimiyyətə qayıdan Ümummilli Lider Heydər Əliyev Azərbaycanı dərin siyasi və iqtisadi böhrandan xilas edərək ölkədə sabitliyin və inkişafın əsasını qoyub.

 

Baş həkim qeyd edib ki, Heydər Əliyevin uzaqgörən siyasəti nəticəsində Azərbaycanın müstəqilliyi qorunub saxlanılıb, dövlətçilik ənənələri möhkəmləndirilib və ölkəmizin gələcək inkişaf strategiyası müəyyənləşdirilib. Bu gün Azərbaycan Respublikasının qazandığı uğurların, beynəlxalq nüfuzunun artmasının və sosial-iqtisadi inkişafının təməlində məhz Ümummilli Liderin müəyyən etdiyi siyasi kurs dayanır.

 

Fəranə Gözəlova vurğulayıb ki, Prezident İlham Əliyev tərəfindən Heydər Əliyev siyasi kursunun uğurla davam etdirilməsi nəticəsində Azərbaycan daha da güclənərək regionun lider dövlətinə çevrilib, xalqımız mühüm nailiyyətlər əldə edib. O, Milli Qurtuluş Gününün dövlətçiliyimizin xilası və müstəqilliyimizin qorunmasının simvolu kimi hər il böyük qürur hissi ilə qeyd olunduğunu diqqətə çatdırıb.