Adil Cümşüdovun sözlərinə görə, nekrotizan fassiit dərialtı yumşaq toxumaların sürətlə yayılaraq toxuma ölümünə səbəb olan ağır bakterial infeksiyasıdır. Əməliyyat olunan pasiyentin ayağının böyük bir hissəsində geniş miqyaslı və dərin yaralar əmələ gəlib. Əməliyyat zamanı nekrozlaşmış toxumalar tam təmizləndikdən sonra hər iki aşağı ətrafdan geniş dəri parçaları götürülərək zədələnmiş sahələrin örtülməsi üçün köçürülüb.

 

Mütəxəssis bildirir ki, bu tip yaralar çox gec sağalır, öz-özünə bərpası olduqca çətindir. Məhz buna görə bu xəstəlik zamanı ən mühüm müalicə üsullarından biri - dəri transplantasiyasıdır: “Dəri köçürülməsi üçün ilk növbədə nekrozlaşmış toxumalar tam təmizlənməlidir. Yara infeksiyadan azad edilməli və qranulyasiya toxuması ilə örtülü olmalıdır ki, köçürülən dəri həmin sahəyə yaxşı adaptasiya olunsun”.

 

Həkimin sözlərinə görə, əməliyyatın uğurla sonlanmasını şərtləndirən digər əsas amil - dərinin düzgün texnika ilə götürülməsidir. Bu məqsədlə Tədris Cərrahiyyə Klinikasında mövcud olan müasir elektrikli dermatom cihazlarından istifadə olunur. Bu texnologiya dərinin optimal qalınlıqda və dəqiqliklə götürülməsinə imkan yaradır.

 

Ümumilikdə dəri köçürülməsindən təxminən 4 gün sonra sarğılar açılır və ilkin nəticələr qiymətləndirilir. Tam sağalma və toxumaların bərpası isə adətən 20–30 gün çəkir. Köçürülmüş dərinin təxminən 90 faizdən çoxu köçürüldüyü sahəyə uğurla adaptasiya olunur, ən yaxşı hallarda bu göstərici 95–100 faizə çata bilir.

 

Adil Cümşüdov əlavə edib ki, bu tip ağır infeksion və travmatik yaralardan savayı, II və III dərəcəli yanıq hallarında da dəri köçürülməsi geniş tətbiq olunur. Bu metod üz, gövdə və bədənin müxtəlif nahiyələrində yaranan geniş toxuma defektlərinin bərpasında effektiv nəticələr verir.

 

Qeyd edək ki, TCK-da dəri köçürülməsi üzrə əməliyyat olunan pasiyentin vəziyyəti stabildir, sağalma prosesi müsbət dinamika göstərir və yaxın günlərdə evə buraxılması gözlənilir.