Klinikadan Aztibb.az-a verilən məlumata görə, əməliyyat II mamalıq-ginekologiya şöbəsinin müdiri, ginekoloq-cərrah Turab Canbaxışov tərəfindən icra olunub.

 

Məlumata görə, təxminən 100 kq çəkisi olan pasiyent son iki il ərzində fasiləsiz uşaqlıq qanaxmalarından əziyyət çəkib. Aparılan medikamentoz müalicələrə baxmayaraq, konservativ yanaşma effektiv nəticə vermədiyi üçün cərrahi müdaxilə zəruri hesab olunub.

 

Pasiyentdə laparoskopik total histerektomiya (uşaqlığın tam çıxarılması) və bilateral salpingo-ooforektomiya (hər iki yumurtalıq və uşaqlıq borularının çıxarılması) əməliyyatı icra edilib. Əməliyyat tam qapalı üsulla, minimal invaziv yanaşma əsasında aparılıb.

 

Turab Canbaxışovun sözlərinə görə, bu tip əməliyyatlar xüsusilə menopauza dövrünə yaxın və ya sonrasında, medikal müalicəyə cavab verməyən hallarda daha çox tətbiq olunur.

 

Həkim bildirib ki, mütəmadi ginekoloji nəzarətdə olan qadınlarda belə ağır cərrahi müdaxilələrə ehtiyac nisbətən az olur:“Qadınlar vaxtında müayinədən keçər və həkim nəzarətində olarlarsa, bu cür əməliyyatlarla daha nadir hallarda üzləşirlər. Lakin artıq çəki, qeyri-sağlam qidalanma, passiv həyat tərzi və həkim müayinələrindən uzaq qalmaq risk faktorlarını artırır”.

 

Əməliyyat zamanı qarın boşluğunda bağırsaq yapışmaları müşahidə olunub və onlar diqqətlə ayrılıb. Cərrahi müdaxilə zamanı bağırsaq zədələnməsi, sidik axarlarının (ureterlərin) və sidik kisəsinin zədələnməsi kimi potensial risklər nəzərə alınıb və əməliyyat bu ağırlaşmalar olmadan tamamlanıb.

 

Həkim əlavə edib ki, hər bir cərrahi müdaxilədə olduğu kimi burada da infeksiya, tromboz və tromboemboliya riski mövcuddur. Xüsusilə artıq çəki bu riskləri daha da artıran amillərdəndir və bu tip əməliyyatlar adətən 45 yaşdan yuxarı pasiyentlərdə daha çox icra olunur.