Səhiyyə Nazirliyi və Azərbaycan Həmkarlar İttifaqları Konfederasiyasının (AHİK) birgə tərəfdaşlığı çərçivəsində “Sağlam gələcək” sosial layihəsinə start verilib.

 

Nazirlikdən Aztibb.az-a bildirilib ki, layihənin məqsədi qadınların reproduktiv sağlamlığının qorunmasına dəstək göstərmək, profilaktik müayinələrin əhəmiyyəti barədə məlumatlılığı artırmaq və sağlam həyat tərzini təşviq etməkdir.

 

Layihə çərçivəsində “Qadın sağlamlığı və reproduktiv rifah” mövzusunda ilk maarifləndirici tədbir keçirilib. Tədbirdə çıxış edən Səhiyyə Nazirliyinin şöbə müdiri Ramik Quliyev qadın sağlamlığının qorunmasının sağlam ailə institutunun möhkəmləndirilməsi, əhalinin rifahının yüksəldilməsi və cəmiyyətin davamlı inkişafı baxımından mühüm əhəmiyyət daşıdığını vurğulayıb.

 

Tədbirdə “Süd vəzi sağlamlığı”, “Qadın sağlamlığının qorunması”, “Stresin reproduktiv sağlamlığa təsiri” və “Reproduktiv sağlamlıq” mövzularında maarifləndirici təqdimatlar keçirilib, iştirakçıların sualları cavablandırılıb.