Azərbaycan Respublikasının Prezidenti cənab İlham Əliyevin rəhbərliyi ilə həyata keçirilən “Böyük Qayıdış” Dövlət Proqramı çərçivəsində azad edilmiş ərazilərdə sosial infrastrukturun bərpası və əhalinin əsas xidmətlərlə təmin olunması istiqamətində tədbirlər ardıcıl şəkildə davam etdirilir.

 

TƏBİB-dən Aztibb.az-a bildirilib ki, bu tədbirlərin tərkib hissəsi olaraq Cəbrayıl Rayon Mərkəzi Xəstəxanasının nəzdində Şükürbəyli kənd həkim məntəqəsi istifadəyə verilib.

Müəssisədə sakinlərə ilkin səhiyyə xidmətlərinin göstərilməsi üçün zəruri şərait yaradılıb. Əsaslı təmir və bərpa işlərindən sonra istifadəyə verilən həkim məntəqəsində 1 həkim, 2 tibb bacısı və 1 sanitar əməkdaş fəaliyyət göstərir.

 

Həkim məntəqəsinin xidmət əhatəsi təxminən 2500 nəfəri əhatə edir. Müəssisə əhalinin ilkin tibbi yardıma çıxış imkanlarının genişləndirilməsinə, profilaktik xidmətlərin gücləndirilməsinə və sağlamlığın qorunmasına xidmət edəcək.

 

Şükürbəyli kəndində həkim məntəqəsinin fəaliyyətə başlaması bölgədə yaşayış üçün zəruri sosial xidmətlərin formalaşdırılması istiqamətində görülən işlərin tərkib hissəsi olmaqla yanaşı, Böyük Qayıdış prosesində səhiyyə xidmətlərinin əlçatanlığının təmin edilməsinə mühüm töhfə verir.

 

Qeyd edək ki, həkim məntəqəsi Azərbaycan Respublikasının Prezidenti cənab İlham Əliyevin Şükürbəyli kəndinə səfəri zamanı verilmiş tapşırıqların icrası çərçivəsində yaradılıb.