Azərbaycan Respublikası Səhiyyə Nazirliyinin tabeliyində fəaliyyət göstərən Bakı Sağlamlıq Mərkəzinin Ürək Mərkəzinin Aritmologiya bölməsi Avropa Ürək Ritm Assosiasiyası (EHRA) tərəfindən tədris mərkəzi kimi tanınaraq beynəlxalq akkreditasiya əldə edib.

 

Bu barədə Aztibb.az-a Səhiyyə Nazirliyindən bildirilib.

 

Bu akkreditasiyadan indiyədək dünya üzrə cəmi 38 mərkəz keçib, Bakı Sağlamlıq Mərkəzi isə siyahıya daxil edilən 39-cu mərkəz olub. Akkreditasiya mürəkkəb ürək ritm pozğunluqlarının müalicəsini həyata keçirən, yüksək texnologiyalardan istifadə edən və tədris fəaliyyəti ilə seçilən tibb müəssisələrinə verilir.

 

Bu status mərkəzi regionda və yaxın coğrafiyada EHRA tərəfindən akkreditə olunmuş ilk tədris mərkəzlərindən birinə çevirir. Akkreditasiya sayəsində müxtəlif ölkələrdən aritmoloqlar EHRA-nın qrant proqramları çərçivəsində burada təlim keçə biləcək, əldə olunan diplomlar isə beynəlxalq səviyyədə tanınacaq.

 

Uzm. Dr. Fərid Əliyevin rəhbərlik etdiyi bölmədə müasir aritmoloji müdaxilələr həyata keçirilir, elmi-tədqiqat və kadr hazırlığı istiqamətində fəaliyyət göstərilir. Bu uğur ölkədə aritmologiya sahəsinin inkişafına və Azərbaycanın beynəlxalq tibbi nüfuzunun güclənməsinə töhfə verəcək.