Qazaxıstanın Astana şəhərində keçirilən “Qazaxıstan səhiyyəsi: yeni çağırışlar şəraitində inkişaf və ailə həkimi təcrübəsində sübuta əsaslanan tibb” mövzusunda beynəlxalq konfransda Səhiyyə Nazirliyinin Tibb Müəssisələrinin Akkreditasiyası və Keyfiyyətə Nəzarət Mərkəzinin əməkdaşları ölkəmizi təmsil ediblər.

Bu barədə Aztibb.az-a Səhiyyə Nazirliyindən məlumat verilib.

Konfransda Qazaxıstan, Azərbaycan, Rusiya, Belarus, Özbəkistan və Qırğızıstanın səhiyyə sistemlərinin nümayəndələri, həmçinin beynəlxalq təşkilatların ekspertləri iştirak ediblər. Tədbir çərçivəsində ilkin tibbi-sanitariya yardımının inkişafı, xəstəliklərin profilaktikası, immunoprofilaktika, səhiyyənin rəqəmsallaşdırılması, tibbi xidmətlərin keyfiyyəti və pasiyent təhlükəsizliyi kimi aktual mövzular ətrafında müzakirələr aparılıb.

Mərkəzin nümayəndələri çıxışlarında tibb işçilərinin peşəkar inkişafı, davamlı tibbi təhsil və uşaqların sağlamlığının qorunması istiqamətində ölkəmizdə həyata keçirilən tədbirlər barədə məlumat veriblər. Azərbaycan nümayəndə heyətinin çıxışları milli səhiyyə sistemimizin nailiyyətlərinin beynəlxalq auditoriyaya çatdırılmasına, təcrübə mübadiləsinin genişlənməsinə və gələcək əməkdaşlıq imkanlarının inkişafına töhfə verib.