Almaniyanın Bayroyt Universitetindən olan alimlər müəyyən ediblər ki, plastik qabların tərkibində olan plastikləşdirici maddə beyinin işinə güclü təsir edə bilər.

Aztibb.az xarici KİV-ə istinadla xəbər verir ki, balıqlar üzərində aparılan təcrübələr göstərib ki, bisfenol A maddəsinin ən aşağı həcmdə istifadəsi belə beyində siqnalların ötürülməsinə təsir göstərib.

“Zədələnmə həmin anda baş vermir, lakin bir aydan sonra aydın görünür. Bunun səbəbi bisfenolların neyronların potensialına birbaşa təsir göstərməsi və sinapslar vasitəsilə siqnalların ötürülməsini dəyişdirməsidir", - deyə tədqiqat müəllifləri vurğulayıblar.

Bisfenol balıq beynindəki ən böyük Mauthner sinir hüceyrələrindən ikisinə mənfi təsir edib. İnsan beyninə təsirləri oxşar və ya daha da pis ola bilər, çünki həmin maddə qida qablarında, plastik qablarda, su şüşələrində, oyuncaqlarda və digər gündəlik əşyalarda olur.