102 şəhəri əhatə edən qlobal tədqiqat zamanı təxminən 55 000 RNT virusu aşkar edilib.

Aztibb.az xəbər verir ki, "Nature Communications" jurnalında dərc olunan araşdırmaya görə, bu virusların böyük əksəriyyəti elmə məlum olmayıb.

Alimlər metro tutacaqlarından tutmuş çirkab sularına və torpaq nümunələrinə qədər müxtəlif yerləri analiz ediblər. Beynəlxalq tədqiqatçılar qrupu tərəfindən aşkar edilən 54 945 müxtəlif virus ardıcıllığının yalnız 23%-i məlum verilənlər bazasına uyğun gəlib, qalan 77%-i isə elm üçün tamamilə yeni olub. Tədqiqatın həmmüəllifi, San-Paulu Universitetinin professoru Antonio Pedro Kamarqonun sözlərinə görə, insanlıq təbiətdəki virus müxtəlifliyini indiyədək qiymətləndirməyib.

Aşkar edilən virusların xüsusiyyətləri

Tədqiqatçılar bütün nəticələri laboratoriyada virus yetişdirməklə deyil, nümunələrdən oxunan genetik kodlar əsasında əldə ediblər. Aşkar edilən mikrobların yalnız üçdə birinin hansı canlı orqanizmi yoluxdurduğu müəyyən edilib və onların yarısından çoxunun bakteriofai (bakteriyaları yoluxduran viruslar) olduğu məlum olub.

Məlumatlara əsasən, tapılan genetik materiallar arasında insanları yoluxdurma ehtimalı yüksək olan 60, digər məməliləri yoluxdurma ehtimalı olan isə 47 hal müəyyən edilib. Bundan əlavə, tədqiqatçılar dərmana dözümlü xəstəxana bakteriyalarını məhv edə biləcək 166 bakteriofaq aşkar ediblər ki, bu da gələcəkdə faq terapiyası üçün böyük əhəmiyyət kəsb edə bilər.

Tədqiqatın nəticələri və gələcək addımlar

Küçələr, banklar və vağzallar torpaq və çirkab suları ilə müqayisədə daha az virus müxtəlifliyi nümayiş etdirib. Tədqiqatçılar bu kolleksiyanı "Şəhər və şəhərətrafı ərazilərin RNT virusları atlası" (UPVAtlas) adlandırıblar. Mütəxəssislər bildirirlər ki, bu kəşflərin insan sağlamlığı üçün dəqiq əhəmiyyətini anlamaq üçün gələcəkdə daha geniş və təkrar analizlərin aparılması vacibdir.