Keşniş Aralıq dənizi mənşəli qədim bitki hesab olunur. Tərkibi efir yağları, A, В, C, Е, K, PP vitaminləri və mikroelementlərlə zəngindir. Keşniş həzm prosesini yaxşılaşdırır, iştahı artırır. Onun özünəməxsus xüsusiyyətlərindən biri də sinir sisteminə sakitləşdirici təsir göstərməsidir.

Aztibb.az xəbər verir ki, keşniş gündəlik qidalanmada geniş istifadə olunur. Lakin həddən artıq qəbul etdikdə yuxugətirici təsir göstərir, yaddaşı zəiflədir. Onun toxumları isə konserv sənayesində, eləcə də qənnadı məmulatlarının hazırlanmasında ədviyyat kimi işlədilir. Keşnişin toxumlarından alınan efir yağı ətriyyat və sabun sənayesində istifadə edilir.

Bundan başqa, keşniş meyvələrindən xroniki mədə-bağırsaq xəstəliklərində iltihabı aradan qaldıran və mədənin həzm prosesini yaxşılaşdıran vasitə kimi çay dəmləyib içirlər.

Keşnişin çox güclü antiseptik, iltihab və mikrob əleyhinə xüsusiyyətləri var. Onu yemək bədəndəki xolesterolu tarazlayır, qan təzyiqinə yaxşı təsir edir. Qan təzyiqi normal olmayan insanlar üçün keşniş otu istehlak edilməsi tövsiyə olunur. 

Bu bitki sümük sağlamlığı və ağız xoraları üçün də faydalıdır.