Dünyanın ən böyük elmi tədqiqat mərkəzi olan Avropa Nüvə Tədqiqatları Mərkəzi (CERN) İsveçrədə yerləşir və antimaddə hissəcikləri istehsal edir. Antimaddəni təşkil edən hissəciklərin elektrik yükü maddənin hissəciklərinin elektrik yükünün əksidir. Antimaddə insanların bu günə qədər əldə edə bildiyi ən güclü enerji mənbəyidir. Onun faydalı iş əmsalı 100%-dir. Müqayisə üçün, nüvə silahının effektivlik faizi cəmi 1,5%-dir. Onun bir damcısından alınan enerji Nyu York şəhərini 1 gün elektrik enerjisi ilə təmin edə bilər.

 

Aztibb.az xəbər verir ki, bu barədə həkim-anestezioloq Şahin Məmmədov sosial şəbəkədə paylaşım edib.  

 

Onun sözlərinə görə, antimaddə bütün maddələrlə, hətta hava ilə əlaqədə olduqda maddəni və özünü yox edir, nəticədə çox güclü enerji ortaya çıxır. 1 qram antimaddə Hiroşimaya atılan atom bombası qədər enerji əmələ gətirir. İndiyədək məlum olan ən dağıdıcı nüvə silahı Rusiyanın (SSRİ 1961) istehsal etdiyi Çar bombasıdır. 1 kq antimaddə bombası isə 27000 kq Çar bombasına bərabərdir. Antimaddənin hazırlanması çox çətindir və böyük vəsait tələb edir. 

 

Ş.Məmmədov bildirib ki, antimaddə dünyada ən bahalı materialıdır. Onun 1 qramı 62,5 trilyon dollardır. Onun enerjisinin ulduzlararası kosmik gəmilərdə istifadə edilməsi planlaşdırılır. Bu maddədən dünyanın ən qorxulu silahının da hazırlanması istisna edilmir. 

 

Həkim-anestezioloq vurğulayıb ki, hazırda antimaddə tibbdə Pozitron Emission Tomoqrafiya müayinəsində (PET) istifadə olunur. PET digər radioloji müayinələrdən fərqli olaraq, hüceyrə daxilində gedən metabolizmi göstərə bilir. Bu qurğu Azərbaycanda yalnız Milli Onkologiya Mərkəzində mövcuddur.