Xərçəng dünyadakı çoxsaylı ölümlərin ikinci əsas səbəbidir. Dünyanın hər 5-ci sakini tez, ya gec bu xəstəliyə tutulur. Xərçənglə əlaqəli ölümlərin 70 faizi aşağı və orta gəlirli ölkələrdə baş verir.

Bu rəqəmlər Ümumdünya Səhiyyə Təşkilatı (ÜST) tərəfindən təqdim edilib.

ÜST ekspertlərinin bildirdiyinə görə, 2020-ci ildə 19,3 milyon insan xərçəng xəstəliyinə tutulub. Bu xəstəlik nəticəsində 10 milyon insan həyatını itirib.

Xəstəliyin ən geniş yayılan növü döş xərçəngidir. Həmçinin ağciyər xərçəngi, yoğun bağırsaq xərçəngi və prostat xərçəngi də geniş yayılıb. Həmçinin bildirilir ki, onkoloji xəstəliklər uşaq və yeniyetmələr arasında ölüm hallarının əsas səbəbinə çevrilib. Hər il 400 min uşağa xərçəng diaqnozu qoyulur.

Mütəxəssislər erkən diaqnozun xərçəng xəstəliyinin müalicəsində əsas rol oynadığını vurğulayırlar. Keyfiyyətli erkən diaqnozun qoyulmaması və müalicənin vaxtında aparılmaması səbəbindən aşağı və orta gəlirli ölkələrdə xərçəng xəstəliyindən ölüm hallarının sayı zəngin ölkələrə nisbətən daha yüksəkdir.

Mütəxəssislər vəziyyətin COVID-19 pandemiyası fonunda daha da gərginləşdiyini söyləyirlər. Bildirilir ki, 2020-ci ildə ölkələrin 40 faizində xərçəng xəstəliyinə tutulanların müalicəsində pandemiya səbəbindən ciddi problemlər yaranıb.