Min illər ərzində bir çox xalqlar bardaş qurmaqdan, çarpaz ayaq mövqeyindən istifadə edərək döşəmədə əyləşib dincəlməyə üstünlük veriblər. Oturacaqların ixtira olunmasına baxmayaraq, döşəmədə oturmaq hələ də bir sıra mədəniyyətlərdə qorunub saxlanılıb.

Aztibb.az cnn.com-a istinadla məlumat verir ki, ingilisdilli xalqlar döşəmədə oturmağı “Hind üslubu” adlandırırlar. Bu oturuş həm də “Türk üslubu” kimi tanınır. Yoqada, çarpaz ayaq üslubunda olan, “suxasana” və ya lotus kimi tanınan bu oturuş növü əzələləri uzatmaq, duruşu yaxşılaşdırmaq və insana rahatlıq gətirmək üçün faydalıdır. Bəzi mütəxəssislər iddia edirlər ki, yemək yeyərkən bu vəziyyətdə oturmaq həzmə kömək edir.

Bardaş qurmaq üsulu ayaq, çanaq və onurğanın elastikliyini və hərəkətini inkişaf etdirməyə kömək edir.

Tədqiqatlar sübut edir ki, oturmağın müxtəlif üsulları bədənimizdə fərqli fiziki stresslər yaradır. Uzun müddət eyni vəziyyətdə oturmaq, bel bölgəsi və çanaq quruluşuna mənfi təsir göstərir. Bunun artrit kimi uzun müddətli sağlamlıq problemlərinə səbəb ola biləcəyi ehtimal olunur. Buna görə də, müxtəlif dəstəklər və ya köməkçi cihazlardan istifadə etmək, eləcə də uzun müddət oturaq vəziyyətdə olanlara tez-tez mövqelərini dəyişmək tövsiyə edilir.

Sağlamlıq mütəxəssisləri döşəmədə oturmağın onurğanın təbii əyriliyini qorumağa kömək etdiyini və bu səbəbdən insanların daha dik oturmalarını və duruşlarını yaxşılaşdırmalarını məsləhət görürlər. Bundan əlavə, döşəmədə oturmaq güc və elastikliliyin artırmasına kömək edir və bel ağrısından qorunmağa yardımçı olur.